MIREKLAMO HANGTUD KARON ANG MGA MOLUPYO SA LIKOD SA TAGBILARAN CITY FIRE STATION KAY HANGTUD KARON WA PA MAHATAGI OG SOLUSYON SA KAGAMHANAN ANG ILANG SULIRAN SA NAPONDO UG NAGLUNANG NGA HUGAW’NG TUBIG NGA GIKAHADLOKANG MAKASAMOT SA KAKUYAW SA ILANG PANGLAWAS
Oct 9th, 2014 by Latest News
Nanghinaut ang mga molupyo diha sa likod sa Tagbilaran City Fire Station nga mahatagan sa kagamhanan og solusyon ang ilang suliran kabahin sa naglunang ug napondo nga hugaw’ng tubig sa maong dapit.
Suma pa sa usa sa mga residente nga si Alipio Valles Jr. nga mosaka ang tubig gani hapit na moabot sa sawog sa ilang balay sa panahon nga mobunok ang kusog nga ulan ug nahadlok sila sa ilang panglawas sanglit aduna namay nataptan sa sakit nga dengue.
Dugay na kaayo ang problema sa mga lumolupyo apan hangtud karon wa pa kini mahatagi og pagtagad.
Nasayran nga nagplano ang mga opisyal sa siyudad nga magama og water treatment facility atubangan sa City Hall alang sa maong problema gawas pa ang luna nga nalunangan sa tubig likod sa stasyonan sa bombero giplanohan usab nga gam-an og punong.
Gibutyag ni Valles nga ang napondong tubig sa maong dapit gikan sa binuga sa hugaw nga kanal gikan sa City Central Market nga masimhot ang kabaho ilabina sa panahon nga mag-ulan
Link back to: Live Radio Recorded Broadcast Hot Topics
