REPORT FROM ALLEN DOYDORA – APRIL 8, 2015
Apr 9th, 2015 by Latest News
April 8 / Local News / Allen D.
Aduna nay gigahin nga pondo ang lokal nga pangamhanan dinhi sa dakbayan sa Tagbilaran alang sa pag-repair sa pansayan sulod sa integrated bus terminal kon IBT nga nahimutang sa barangay dao ning syudad.
Kini maoy gibutyag ni inday inting tagdumala sa ibt atol sa pakighinabi sa dyrd balita.
Matud ni inting nga ang moang pondo gikan sa bohol earthquake assistance kon bea fund nga gibanabanaang mokabat sa kapin kon kulang duha ka milyon ka pesos.
Ang nahisgutang kantidad dili lang sa pagpaayo sa pansayan apan sa kinatibuk-ang pag-repair sa mga daut sa sulod ug gawas sa terminal.
Sa pagkakaron adunay duha ka mga bag-ong pansayan sulod sa terminal nga maoy kasamtangang gigamit samtang wala pa gi-ayo ang karaan nga pansayan.
April 7 / Local News / Allen D.
Karong sunod semana hayan ibalik na sa land transportation office LTO ngadto mga sakop sa highway patrol group HPG ang otoridad nga maka-isyu ug temporary operators permit kon TOP.
Kini maoy gibutyag sa bag-ong hepe sa HPG bohol nga si P/Insp. Saturnino Sedigo atol sa pakighinabi sa dyrd balita.
Suma pa kang sedigo nga human sa usa ka semanang seminar sa mga sakop sa HPG mamahimo nang maka-isyu ug TOP ngadto sa mga malapason sa balaud trapiko.
Suma sa opisyal nga dunay 3 ka mga sakop sa HPG dinhi sa bohol ang mipailawom sa moang seminar nga mao usab ang mamahimong mahatagan ug TOP sa LTO.
April 7 / Local News / Allen D.
Padayon nga nagpahimangno ang Commission on Elections ngadto sa mga botante sa pagkompleto sa mga gikinahanglan alang sa pagparehistro isip pagpangandam sa pinliay karong mayo 2016.
Suma sa comelec nga samtang sayo pa mas maayon atimanon sa mga botante ang ilang pagparehistro aron dili magdasok sa buhatan sa katapusang adlaw sa rehistrasyon nga gikatakdan karong oktubre 31 tuig 2015.
Sagad sa mga naandan nga sa katapusang adlaw pa lihokon sa mga botante ang ilang pagparehistro inay karong mga panahuna nga taas pa ang panahon.
Ang pagasikaso sa pag-parehistro naglangkub sa pagbalhin sa registration records, pag-usab sa pangalan, corrections sa entries sa registration record, reactivation sa registration record, reinstatement sa pangalan sa mga listahan sa botante lakip na ang registration records sa libro sa botante, va-lidation sa registration of records, ug ang pag-update sa mga records.
April 7 / Local News / Allen D.
Pormal na nga gibuksan niadtong dominggo sa gabei ang gikahinamang Leysian Carnaval nga nahimutang atubangan sa central public market ning dakbayan sa Tagbilaran.
Ang pag-abli sa maong carnival subay sa nagsing-abot nga kapistahan dinhi sa syudad karong umaabot nga abril 22 ning tuiga.
Matud pa kang jun besa sa business economic enterprises nga sa pagkakaron unom palang ka mga rides ang available sulod sa carnival nga mohatag ug lingaw sa mga kaigsuonang tagbilaranon ug bisan sa mga gikan sa kalungsuran nga bout mo-saksi sa mga kalingawan nga gitanyag sa syudad.
Gawas sa mga rides matud ni besa nga plano pang butangan ug dugang makalingaw nga talan-awon sa mga bisita.
Samtang gipaniguro usab niini nga luwas ang tanang mga mosakay sa mga rides sanglit gi-susi mismo sa mga tinugyanan sa syudad ang tanang mga rides aron masigurong luwas ang tanan ilabi na sa mga kabataan.
April 7 / Local News / Allen D.
Hugot nga nagpahimangno karon ang mga tinugyanan sa community environment and natural resources office kon cenro ngadto sa katawhan nga likayan ang pag-sunog sa bisan asang dapit ilabi na sa mga kalasangan ug kasagbutan.
Kini tungod kay karong panahon sa ting-init dali lang mokaylap ang kalayo ilabi na sa mga uga nga dahon ug mga sagbot sa kalasangan nga maoy hinungdan nga dunay mahitabong kaingin.
Suma sa cenro nga karong tuiga adunay natala ang buhatan kabahin sa kaingin sa mga bukirong bahin sa lalawigan base usab sa ilang nadawat nga tahu gikan sa mga nagpakabanang katawhan.
Nagbahad ang cenro nga bug-at ang ipahamtang nga silot sa bisan kinsang masakpan nga mohimo ug kaingin sa usa ka dapit.
Samtang gi-awhag usab niini ang katawhan nga motabang sa pagbantay sa ilang dapit aron walay mahitabong dakong damyos sa kinaiyahan.
Link back to: Live Radio Recorded Broadcast Hot Topics