REPORT FROM REY TUTAS – APRIL 10, 2015
Apr 10th, 2015 by Latest News
LOKAL NGA BALITA
ABRIL 10, 2015
REYTUT’s
ANIA DINHI SA BOHOL KARONG ADLAWA ANG DUHA KA MGA MIYEMBRO SA GABINETE NI PRESIDENTE BENIGNO AQUINO III NGA SILA SI DEPARTMENT OF BUDGET SECRETARY BUTCH ABAD UG HEALTH SECRETARY JANETTE GARIN ARON SA PAGTAMBONG SA MGA KALIHUKAN SA PROBINSYA SAMA SA BOHOL HEALTH SUMMIT
Nahidangat kagahapon dinhi sa Bohol si Department of Budget and Management Secretary Butch Abad samtang karong adlawa usab laing pang miyembro sa gabinete ni Presidente Benigno Aquino III ang moabot.
Atul sa pagbukas sa ikaduhang Health Summit sa lalawigan kagahapon, gitaho ni Gobernador Edgar Chatto nga ania karon dinhi sila si Secretary Abad ug Health Secretary Janette Garin.
Si Kalihim Abad mihimo og pagyukbo kang Gobernador Chatto didto sa Peoples Mansion kagahapon samtang si Secretary Garin maoy pinasidunggang dinapit sa gipahigayon karon nga Bohol Health Summit 2015 sa Bohol Cultural Center.
Ang Bohol Health Summit 2015 gitambungan nila ni DOH-7 Regional Director Dr. Jaime Bernadas, Provincial Health Officer Dr. Reymoses Cabagnot, mga mayor ug ubang opisyal sa kalungsuran, mga medical ug health practioner ug mga NGO’s.
Mamulong si Garin sa maong kalihukan karong hapon kabahin sa mga proyekto’g programa ug mga problema nga sulbaronon sa departamento sa panglawas.
LOKAL NGA BALITA
ABRIL 10, 2015
REYTUT’s
IPAHIGAYON DINHI SA BOHOL SA KATAPUSANG SEMANA KARON BUWANA ANG VISAYAS ISLAND CONGRESS SA MGA KONSEHAL SA KALUNGSURAN SA TIBUOK KABISAY-AN
Gibutyag ni Philippine Councilors League- Bohol Chapter President Antonio Ouano Jr. nga sa katapusang semana ning buwan sa Abril ipahigayon nila dinhi sa lalawigan sa Bohol ang Visayas Island Congress.
Si Bokal Ouano niingon nga gisibog ang dakong kalihukan sa mga konsehal sa mga kalungsuran sa tibuok kabisay-an nga gitakda unta karong sunod semana tungod sa mga kakuli-an.
Gihipno karon sa mga kadagkuan sa PCL-Bohol Chapter ang pagpangandam sa Visayas Island Congress nga ipahigayon diha sa Bellevue Hotel sa lungsod sa Panglao karong Abril 28-30.
Mokabat sa 1,500 ka mga konsehal sa mga kalungsuran sa kabisay-an ang gilaumang motambong sa maong panagtapok.
Gipasabot ni Ouano nga ang katuyuan niini mao ang paghatag og impormasyon ug edukasyon sa kalig-on sa mga bol-anon ingon man usab pagtabang sa pagbangon sa Bohol pinaagi sa turismo.
LOKAL NGA BALITA
ABRIL 10, 2015
REYTUT’s
GIPAHUGTAN NI MAYOR MIRIAM SUMAYLO PINAAGI SA PAGBUTANG OG PERMANENTENG TIGBANTAY ANG DAPIT SA BORJA BRIDGE SA LUNGSOD SA DAUIS ARON DILI NA MAKAHIGAYON OG PANGG-INOM ANG MGA TAWO NGA MANGGIPONDO PANAHON SA KAGABIHON
Gipahugtan ni Mayor Miriam Sumaylo pinaagi sa pagbutang og permanenteng tigbantay ang dapit sa Borja Bridge sa lungsod sa Dauis aron dili na makahigayon og panggi-inom ang mga tawo nga manggipondo panahon sa kagabihon.
Gawas nga adunay permanenteng tinogyanan sa balaod nga magbantay sa maong lugar, duna say kanunay mag-roving aron wala say makapahigayon og drag racing nga mga motorsiklo.
Kini ang gihimong lakang ni Mayor Sumaylo agig tubag sa reklamo sa mga tawo nga gigamang tapukanan ilabina sa mga batan-on panahon sa kagabihon ug gikahadlokan nga mahimo kini nga suyopanan og shabu.
Gitataw sa mayor nga taman lang sa alas 10 sa kagabii gitugot ang pagpondo ug pagtapok-tapok apan dili pwedeng mangg-inom og mga ilimnong makahubog.
Kasagaran sa mga manggipondo sa maong lugar dili taga Dauis.
Samtang gipabutangan na sa mayor og pahimangno ang gamayng bahin sa dagat dapit gihapon sa maong taytayan gumikan sa daghan na’g mga nangamatay tungod sa pagkalumos nunot sa kusog nga sug ug giingong “lilo” sa tubig –dagat.
REPORT FROM REY TUTAS – APRIL 10, 2015
Link back to: Live Radio Recorded Broadcast Hot Topics