REPORT FROM REY TUTAS – APRIL 7, 2015
Apr 8th, 2015 by Latest News
ABRIL 7, 2015
REYTUT’s
NAGPASIDAAN ANG DEPARTMENT OF HEALTH SA PUBLIKO NGA AMPINGAN ANG ILANG PANGLAWAS TUNGOD SA PAGSULPOT SA MGA SAKIT SA PANAHON SA TING-INIT
Nagpasidaan ang Department of Health sa publiko nga ampingan ang ilang panglawas tungod sa pagsulpot sa mga sakit sa panahon sa ting-init.
Kini ang pahimangno ni Dr. Expedito Medalla, hepe sa Department of Health-Region 7 Health Emergency Management Staff kon HEMS kalabot sa pagsugod usab sa bakasyon ug mga kalihukan sa katawhan apil na ang pista ug uban pa.
Matud ni Dr. Medalla nga ning panahon sa ting-init mosulpot ang mga waterborne diseases ingon man usab sore eyes, sunburn, sip-on ug ubo.
Nagpahinumdom usab si Medalla nga likayanang pagkaon sa mga street foods kon mga pagkaong gibaligya sa mga kadalanan nga posibling wala maayo pagkahugas sa wala pa luto-a apil na ang mga ice nga wala masayri kung asa gikan ang tubig.
Gipasidan-an usab sa maong opisyal ang katawhan nga dili magpalabi’g buwad sa init sa adlaw aron dili maigo sa sakit nga heatstroke apan dili man gayud malikayan nga mogawas sa panimalay, tambag ni Medalla nga magdala gayud og payong o kaha magsul-ob og kalo aron dili direkta nga moigo sa panit ang init sa adlaw.
LOKAL NGA BALITA
ABRIL 7, 2015
REYTUT’s
GILUSAD SA KAPOLISAN SA PROBINSIYA ANG “OPLAN SUMVAC” KON OPLAN SUMMER VACATION ALANG SA SEGURIDAD SA KATAWHANG MAGBAKASYON NING PANAHON SA TING-INIT
Gipatuman sa kapolisan sa probinsiya ang hugot nga seguridad ning panahon sa ting-init.
Gibutyag ni Police Superintendent Nicomedes Olaivar, hepe sa Operations Branch sa Bohol Police Provincial Office kon BPPO nga gilusad nila ang “Oplan SumVac”kon Oplan Summer Vacation alang sa seguridad sa mga katawhan nga magbakasyon ning panahon sa ting-init.
Si P/Supt. Olaivar niingon nga adunay silay gipahimutang nga mga police assistance center ilabina sa mga lugar nga sagad duawon sa mga turista sama sa mga beach resort.
Nabaniog ang Bohol nga daghang tawo ang mobisita ilabina sa buwan sa Mayo tungod sa usa ka bulang pista.
Ang “Oplan SumVac” subay kini sa mando sa nasudnong kapolisan aron mahimong luwas ang publiko gikan sa mga krimen.
Gawas sa mga police assistance center, duna say gipahilunang mga checkpoint sa mga kadalanan ug gipangusgan pa gyud ang police visibility.
Nanghinaut ang kapolisan sa lalawigan nga gipangulohan ni Provincial Director Police Senior Superintendent Dennis Agustin nga magmalinawon ang summer sa Bohol nga giilang tourist destination sa tibuok kalibutan.
LOKAL NGA BALITA
ABRIL 7, 2015
REYTUT’s
GIPAHUNONG NI CARMEN MAYOR RICARDO FRANCISCO TORIBIO ANG PAGPATUMAN SA PAGPASAKA SA BAYRUNON SA PAGSULOD SA CHOCOLATE HILLS COMPLEX
Wala ipatuman sa mayor sa lungsod sa Carmen ang pagpasaka sa bayrunon sa pagsulod sa Chocolate Hills Complex.
Kini ang gibutyag ni Mayor Ricardo Francisco Toribio dihang nahinabi sa DYRD Balita kagahapong adlawa.
Si Mayor Toribio niingon nga wala niya idayon og patuman ang 100 gikan sa 50 pesos nga entrance fee pinaagi sa gipasar nga ordinansa sa Sangguniang Bayan sa Carmen tungod sa hangyo sa ubang sektor ilabina na gyud sa turismo.
Matud ni Toribio nga kinahanglang pasakaan ang entrance fee sa chocolate hills complex aron mapa-ugmad ug paghatag og maayong serbisyo ngadto sa mga turista.
Kahinumdomang nipasar ang Sangguniang Panlalawigan og usa ka resolusyon nag-awhag ni mayor Toribio nga dili una ipatuman ang maong ordinansa tungod kay nagkinahanglan pa kini og dugang konsultasyon dili lang sa lungsod sa Carmen apil na ang ubang stakeholders ilabina sa industriya sa turismo ug sa kagamhanang probinisyal sa Bohol nga nanag-iya sa Chocolate Hills Complex.
Link back to: Live Radio Recorded Broadcast Hot Topics