REPORT FROM REY TUTAS – APRIL 8, 2015
Apr 9th, 2015 by Latest News
LOKAL NGA BALITA
ABRIL 8, 2015
REYTUT’s
GIKAHADLOKAN NGA MAHIMONG SUYOPANAN OG SHABU ANG DAPIT SA BORJA BRIDGE SA DAUIS TUNGOD KAY GIHIMONG TAPUKANAN UG IMNANAN ILABINA SA MGA BATAN-ON PANAHON SA KAGABIHON
Gikahadlokan nga mahimong lugar nga suyopanan og shabu ang dapit sa Borja Bridge sa Dauis tungod kay gihimo kini nga tapukanan sa mga tawo.
Pipila ka mga tawo mireklamo kay daghan ang mga manggitapok ug manggi-inom og mga ilimnong makahubog ilabina ang mga batan-on panahon sa kagabihon.
Ang maong publikong dapit gihimo usab nga lugar nga manggilumba ang mga motorsiklo’ng dagkog tingog ang tambutso kon drag racing.
Dugay na ang maong reklamo apan nagpabilin pa gihapon karon ang maong suliran. Ang kalihukan nga drag racing sa mga motorsiklo panahon sa lawom nga kagabihon gireklamo tungod kay makatugaw kini sa mga tawo nga nangatulog.
Nasayran sa DYRD nga gihatagan kini og pagtagad sa kapolisan sa Dauis apan nibalik gihapon ang maong problema.
LOKAL NGA BALITA
ABRIL 8, 2015
REYTUT’s
NAGPAHAYAG OG TINGUHA NGA MODAGAN PAGKA-BISE GOBERNADOR SA SUNOD TUIG NGA PINILIAY SI MAYOR ROSEMARIE IMBOY SA LUNGSOD SA LOAY
Wala mausab ang naunang desisyon sa mayor sa lungsod sa Loay nga modagan sa pagka-bise gobernador sa sunod tuig nga piniliay.
Kini ang pamahayag ni Mayor Rosemarie Imboy nga nahinabi sa DYRD Balita. Si Mayor Imboy kinsa motapos sa iyang termino sa pagka-mayor sa bulan sa Hunyo sa sunod tuig determinado gayud nga magpapili sa maong posisyon sa gobyerno.
Apan ang iyang pamilya matud niya nga buot nga kongresista ang iyang lansaran. Matud ni Imboy nga nikonsulta usab siya sa mga tawo bahin sa iyang tinguha nga magpapili sa pagka-bise gobernador.
Ang mayor sa Loay kansang bana si Brigido Imboy kasamtangan karon nga bokal sa probinsiya sa tersero distrito ubos sa landong sa partido Liberal dihang nilansad sa pagkamayor niadtong 2013 nga piniliay.
Matud sa mayor sa Loay nga sa pagkakaron wala pa siya mahibalo kung asa siya magpalandong nga politikanhong partido.
LOKAL NGA BALITA
ABRIL 8, 2015
REYTUT’s
GISIGURO SA MGA KADAGKUAN SA DAKBAYAN NGA LUWAS SA MGA KRIMEN ANG MGA TAWO NGA MOSULOD SA CARNIVAL NGA NAHIMUTANG KILID SA CITY CENTRAL PUBLIC MARKET
Gisiguro sa mga kadagkuan sa dakbayan nga luwas sa krimen ang mga tawo nga mosulod sa carnival nga nahimutang kilid sa City Central Public Market.
Gipahayag ni City Administrator Leonides Borja nga hugot nga seguridad ang ilang gipatuman sa maong lugar pinaagi sa pagbutang og mga pulis, ALERT Team aron masiguro ang kaluwasan sa katawhan.
Matud ni Borja nga duna say gibutang nila nga mga medical team kon ugaling adunay mga aksidente nga mahitabo sa mga mosakay sa mga rides sa carnival.
Ang Leysian Carnival nga dunay mga nagkalain-laing rides sama sa Giant Bee, Sizzler, Feriz Wheel ug uban pa gibuksan niadtong domingo para sa kalingawan sa publiko. Kini kabahin sa mga kalihukan sa nagsingabot nga pista ning dakbayan.
Dugang pa sa City Administrator nga gumikan kay kulang kaayo ang mga pulis sa siyudad, nagkinahanglan usab ang mga tinogyanan sa balaod og pag-abag sa katawhan sa pagsumpo sa mga krimen.
Link back to: Live Radio Recorded Broadcast Hot Topics