REPORT FROM REY TUTAS – MARCH 18, 2015
Mar 19th, 2015 by Latest News
LOKAL NGA BALITA
MARSO 18, 2015
REYTUT’s
GITAKDANG IBALIK NGADTO SA LALAWIGAN SA SUGBO KARONG UDTO ANG MILAGROSANG BIRHEN SA SIMALA NGA ANIA PA KARON DINHI SA DAKBAYAN SA TAGBILARAN DIIN ANG MGA DEBOTO NAGMAYA DIHANG NAKAHAWOK UG NAKITA NILA ANG MAHAL NGA BIRHEN
Gitakdang ibalik ngadto sa lungsod sa Argao sa lalawigan sa Sugbo karong adlawa ang milagrosang Birhen sa Simala nga ania pa karon dinhi sa dakbayan sa Tagbilaran.
Sa dili pa kini ibalik didto sa Sugbo, ang veneration kon pagpanghawok ngadto sa mahal nga birhen himuon karong alas otso sa buntag ug sa pagka alas 10:30, usa ka farewell mass ang ipahigayon ug alas 12 sa udto mao na ang pag-uli sa Birhen ngadto sa Argao, Cebu nga manukad diha sa pantalan ning dakbayan.
Sukad nga niabot dinhi sa dakbayan ang Birhen sa Simala niadtong Lunes sa hapon, gidugok ug mainiton kining gi-abi-abi sa mga deboto gikan sa nagkalain-laing dapit dinhi sa Bohol.
Ang pipila ka mga deboto nga mihatag sa ilang testimonya mipadayag sa ilang pagmaya tungod sa paghawok ug pagkahimamat nila sa mahal nga birhen nga giingong nagmilagro atul sa pag-abot dinhi sa siyudad.
LOKAL NGA BALITA
MARSO 18, 2015
REYTUT’s
GIHAGIT NI GOBERNADOR EDGAR CHATTO UG MAYOR JOSE MAYOR PAHANG ANG MGA KATAWHAN SA LUNGSOD SA ANTEQUERA NGA LIG-ONON ANG PANAGHIUSA KUYOG SA NAG-USAB NGA KLIMA ARON MAPAUGMAD PA UG MAKABANGON GIKAN SA PAGKAPUKAN TUNGOD SA MGA KATALAGMAN
Gihagit ni Gobernador Edgar Chatto ug Mayor Jose Mario Pahang atul sa sumad sa lungsod sa Antequera ang mga katawhan nga lig-onon ang panaghiusa kuyog sa bag-o ug nag-usab nga klima.
Ang hagit sa gobernador ug mayor subay sa tema” Antequera: 139 ka na Panaghiusa, kadasig, kakugi ug paglaum kuyog sa kabag-ohan sa atong panahon karon” atul sa pagsaulog sa kagahapon sa ika-139 nga Foundation Day nga gipanguluhan ni Mayor Pahang, Sangguniang Bayan member pinanguluhan ni Bise Mayor Simon Leo Jadulco.
Ang kasaulogan gitambungan sa mga magtutudlo, bokal sa unang distrito ug mga kapitanis sa barangay.
Atul sa sumad sa lungsod, gitugyan sa National Irrigation Administration kon NIA pinaagi ni Director Mario Sandi sa NIA-7 ang 46 milyones pesos nga pondo alang sa mga proyektong irigasyon ug mga kahimanang pang-agrikultura gikan sa kagamhanang probinsiyal pinaagi sa Office of the Provincial Agriculturist ubos ni Larry Pamugas.
Mapasalamaton ang mga taga Antequera sa mga mihoras nga ug pagtabang ni Gobernador Chatto nga makabangon gikan sa pagkahugno tungod sa mga milabayng katalagman. Gibuksan ang adlaw’ng natawhan sa Antequera pinaagi sa gilusad nga unang basket festival ug gitak-opan sa usa ka street dancing competition.
LOKAL NGA BALITA
MARSO 18, 2015
REYTUT’s
GIHAGIT NI GOBERNADOR EDGAR CHATTO ANG PUBLIKO ATUL SA PAGSAULOG SA IKA-450 NGA SUMAD SA SANDUGO NGA MAKIGBUGNO BATOK SA KINSA MANG BUOT MOGUBA SA KALINAW SA LALAWIGAN SA BOHOL
Gihagit ni Gobernador Edgar Chatto ang publiko nga makigbugno batok sa kinsa mang buot mohimo og kagubot sa kalinaw sa lalawigan sa Bohol.
Ang hagit sa gobernador iyang gihimo atul sa paghandum sa ika-450 nga sumad sa Sandugo kagahapong adlawa didto sa Blood Compact Shrine sa Brgy. Bool ning dakbayan sa Tagbilaran.
Ang pagtimaan sa sumad sa Sandugo kagahapon gipanguluhan ni Mayor John Geesnell Yap ug gitambungan sa mga sakop sa Sangguniang Panlungsod nga gipanguluhan ni Bise Mayor Jose Antonio Veloso, hunta probinsiyal ug mga magtutudlo dinhi sa dakbayan.
Matud ni Chatto nga ang matag usa kinahanglang dili motugot nga gub-on ang kalinaw nga nakab-ot karon sa siyudad ug probinsiya.
Ang kampanya sa kapolisan ug ubang tinogyanan sa balaod batok sa drogas ug ubang kriminalidad kinahanglang tabangan aron ma-preserba ang panaghiusa sa katawhan, sumala sa gobernador.
LOKAL NGA BALITA
MARSO 18, 2015
REYTUT’s
GIAPROBAHAN SA HUNTA PROBINSIYAL ANG MORATORIUM SA BAYRONON SA PAGPANGREHISTRO UG PAGPAMAKUNA SA MGA IRO GIKAN KARONG BULANA HANGTUD NA SA KATAPUSANG BULAN SA MAYO SA TIBUOK LALAWIGAN SA BOHOL
Giaprobahan sa hunta probinsiyal atul sa regular session sa niaging biyernes nga gipanguluhan ni Senior Board Member Dionisio Balite ang resolusyon nga naghatag og moratorium sa bayronon sa pagpangrehistro ug pagpamakuna sa mga iro sa tibuok lalawigan sa Bohol.
Si Gobernador Edgar Chatto mihangyo sa Sangguniang Panlalawigan aron maaghat ug wa nay rason ang mga tag-iya og iro sa pagpatala ug pagpabakuna sa ilang mga hayop kay gihunong man ang bayronon gikan karong buwana hangtud na sa katapusan sa bulan sa Mayo karong tuiga.
Matud ni Majority Floorleader ug Committee on Health Chairman Bokal Cesar Tomas Lopez nga makaalarma ang mga insidente sa paak sa mga iro batok sa mubo nga vaccination rate tungod sa registration fee nga nakadiskurahi sa mga tag-iya’g iro.
Matud usab ni Provincial Veterenarian Dr. Stella Marie Lapiz nga pabor siya sa moratorium nga epektibo ang dinaghang pagpamakuna sud sa mubo nga higayon.
Sumala ni Lapiz nga dili problema ang mga bakuna tungod kay daghan man ang stocks niini gikan sa donasyon sa World Health Organization kon WHO.
Link back to: Live Radio Recorded Broadcast Hot Topics
