Report from Rey Tutas – March 20, 2015
Mar 22nd, 2015 by Latest News
LOKAL NGA BALITA
MARSO 20, 2015
REYTUT’s
GIPAHIMANGNOAN SA TINOGYANAN SA BUHATAN SA PANGLAWAS SA PROBINSYA ANG PUBLIKO NGA DILI MAGPALABI’G BUWAD SA INIT KARONG PANAHONA KAY POSIBLING MAIGO SA SAKIT NGA HEATSTROKE
Gipanghimangnoan sa buhatan sa panglawas sa probinsiya ang publiko nga dili magpalabi’g buwad sa grabe kainit nga nasinati karong mga panahona.
Tambag ni Provincial Health Officer Dr. Reymoses Cabagnot sa mga katawhan nga tungod kay dili man gyud kalikayan nga mogawas sa mga panimalay o sa mga buhatan magdala gayud og payong o bisan unsang makatabon sa ulo o kaha sa lawas aron dili diretsong moigo sa panit ang init sa adlaw.
Matud ni Dr. Cabagnot nga magdala’g tubig nga mainom panahon nga mogawas sa balay ilabina sa udto nga maoy masinati ang grabeng kainit sa panahon. Ang pagpalabi’g buwad sa init sa adlaw posibling maka-heatstroke, sumala sa Provincial Health Officer.
Dugang pa ni Cabagnot nga magpakonsulta dayon sa pinakaduol nga Health Center kung makasinati og dili maayong pamati sa kalawasan.
LOKAL NGA BALITA
MARSO 20, 2015
REYTUT’s
MOHATAG OG USA KA ALCOHOLIC BREATH ANALYZER ANG PROVINCIAL PEACE AND ORDER COUNCIL NGADTO SA HIGHWAY PATROL GROUP SA BOHOL ARON MAOY MAGAMIT SA PAGPANAKOP SA MGA NAGMANEHO’G SAKYANAN NGA NAKAINOM OG ILIMNONG MAKAHUBOG
Mohatag ang Provincial Peace and Order Council kon PPOC og usa ka Alcoholic Breath Analyzer ngadto sa Highway Patrol Group sa Bohol.
Kini ang gisaad sa Provincial Peace and Order Council atul pinaka-ulahing tigum sa konseho didto sa Governor’s Mansion nga gipanguluhan sa tsirman nga si Gobernador Edgar Chatto.
Gipasalig sa konseho nga mohatag sa maong aparato human nangayo’g tabang ang hepe sa Highway Patrol Group dinhi sa probinsiya nga si P/SInsp. Gregorio Sanchez.
Matud ni P/SInsp. Sanchez nga nagpaabot na lang ang iyang buhatan sa maong aparato nga nagkantidad lang og dili moubos sa 15 mil pesos.
Pareha sa mga stasyonan sa kapolisan ug mga lokal nga buhatan sa Land Transportation Office, wala say Alcoholic Breath Analyzer karon ang HPG busa dili pa mapatuman dinhi sa probinsiya ang Anti-Drunk and Drugged Driving Act kon Republic Act 10586 nga gipatuman sugod niadtong Marso 12 karong tuiga. Wala pa say Temporary Operators Permit kon TOP ang HPG apan sa sunod semana gikatakdang mopaubos sila sa deputization seminar.
LOKAL NGA BALITA
MARSO 20, 2015
REYTUT’s
GIPAMAHAYAG SA PROJECT ENGINEER SA C.B. GARAY PHILWIDE BUILDERS, ANG KONTRAKTOR SA NAGPADAYONG GITRABAHO NGA APRON SA TUGPAHANAN SA SIYUDAD SA TAGBILARAN NGA HINAY ANG ILANG TRABAHO KARON TUNGOD KAY NAGLISOD SILA SA PAGPANGITA OG ANAPOG NGA ITAMBAK ALANG SA MAONG PROYEKTO
Magduha na ka buwan ang gitrabaho karon nga apron sa tugpahanan sa siyudad sa Tagbilaran apan hinay ang dagan sa trabaho.
Kini ang giangkon sa Engr. Ian Ray Agustin, Project Engineer sa C.B. Garay Philwide Builders, ang kontraktor sa proposed remote Apron parking area sa tugaphanan sa siyudad. Mahuman ang maong proyekto sa Agosto 8 karong tuiga apan gitinguhang matapos kini sulod sa lima ka buwan nga gisugdan niadtong unang semana sa milabay’ng Pebrero.
Ang Apron sa tugpahanan nagkantidad og kapin sa 38 milyones pesos nga dunay gidak-on nga 1.7 ka ektarya.
Gitinguha sa kontraktor nga mahuman og dali ang maong proyekto kay mao kini ang gusto sa Civil Aviation Authority of the Philippines kon CAAP tungod sa mga miaging pagka-aberya sa mga abyon nga nakaingon sa kalangan sa mga panaw, way makatugpa ug makalupad nga eroplano tungod sa “One Plane Policy”.
Link back to: Live Radio Recorded Broadcast Hot Topics