REPORT FROM REY TUTAS – MARCH 26, 2015
Mar 27th, 2015 by Latest News
LOKAL NGA BALITA
MARSO 26, 2015
REYTUT’s
IPAHIGAYON KARONG BUNTAG IMBES UGMANG ADLAWA ANG SESYON SA SANGGUNIANG PANLALAWIGAN TUNGOD SA HIMUONG PAGTAK-OP SA MGA KALIHUKAN SA MGA KABABAYEN-AN SA PROBINSIYA KON NATIONAL WOMENS CULMINATION
Ipahigayon karong buntag imbes ugmang adlawa ang regular sesyon sa hunta probinsiyal.
Kini sumala pa ni Bokal Cesar Tomas Lopez, tsirman sa Committee on Health and Sanitation sa Sangguniang Panlalawigan.
Matud ni Bokal Lopez nga karong adlawa ang ilang sesyon nga pangulohan ni Bise Gobernador Concepcion Lim tungod sa himuong pagtak-op ugmang adlawa sa usa ka bulan nga kalihukan sa kababayenhan sa probinsiya kon National Womens Month Culmination nga pagatambungan ni Secretary Leila de Lima sa Department Of Justice isip pinasidunggang mamumulong.
Kahinumdoman nga walay sesyon nga nahitabo niadtong biyernes sa Sangguniang Panlalawigan tungod sa walay quorum gumikan kay katunga sa mga gidaghanon sa mga bokal sa probinsiya gipili nga adto sa ilang mga opisyal nga kalihukan motambong.
LOKAL NGA BALITA
MARSO 26, 2015
REYTUT’s
MAHIDANGAT KARONG HAPON DINHI SA BOHOL SI DAVAO CITY MAYOR RODRIGO DUTERTE KINSA MAKIGTABO SA MGA SAKOP SA MEDIA UG MAOY PINASIDUNGGANG MAMUMULONG SA PAGTAPOS SA PAGTUNGHA SA MGA TINUN-AN SA BOHOL INSTITUTE OF TECHNOLOGY-INTERNATIONAL COLLEGE
Mahidangat karong hapon dinhi sa lalawigan sa Bohol si Mayor Rodrigo Duterte sa dakbayan sa Davao.
Kini ang gipamatud-an sa mayor sa lungsod sa Maribojoc ug kanhi City Administrator sa siyudad sa Davao Leoncio Evasco atul sa pakighinabi sa DYRD Balita.
Si Mayor Evasco niingon nga gitakdang makigtagbo si Duterte sa mga sakop sa media dinhi sa probinsiya atul sa “Meet the Press” diha sa Bohol Tropics.
Gawas sa himuong pakigtagbo sa mga sakop sa media, ang mayor usab sa pinakadakong siyudad sa tibuok Pilipinas maoy pinasidunggang mamumulong sa pagtapos sa pagtungha sa mga tinun-an sa upat ka mga tunghaan sa Bohol Institute of Technology-International College kon BIT-IC, sumala ni Bokal Dionisio Balite sa tresero distrito sa lalawigan.
Gipamahayag usab ni Bokal Balite nga ang pagtambong ni Duterte sa mga kalihukan sa maong eskwelahan karong hapon mao pay unang higayon nga linawas kini niyang mahimamat.
Si Mayor Duterte,ang naila nga tigsanta sa droga ug nangusog sa Federal nga pangagamhanan usa lang sa mga nitumaw nga mga pangalan nga modagan sa pagka-presidente sa sunod tuig nga piniliay.
LOKAL NGA BALITA
MARSO 26, 2015
REYTUT’s
GIKATAKDANG MAHIDANGAT UGMANG ADLAWA DINHI SA BOHOL SI DEPARTMENT OF JUSTICE SECRETARY LEILA DE LIMA NGA MAOY PINASIDUNGGANG MAMUMULONG SA PAGTAK-OP SA MGA KALIHUKAN SA MGA KABABAYEN-AN SA PROBINSIYA KON NATIONAL WOMENS MONTH CULMINATION DIHA SA BOHOL CULTURAL CENTER
Gikatakdang mahidangat ugmang adlawa, Biyernes, dinhi sa lalawigan sa Bohol si kalihim Leila de Lima sa Department of Justice kon DOJ.
Kini ang nasayran sa DYRD Balita gikan sa usa ka kasaligang tinubdan sa kapitolyo. Si Justice Secretary de Lima maoy pinasidunggang mamumulong sa himuong pagtak-op sa mga kalihukan sa mga kabayen-an sa probinsya kon National Womens Month Culmination diha sa Bohol Cultural Center, matud sa tinubdan.
Sa panahon ni kanhi Presidente Gloria Macapagal Arroyo, nahimong Chairperson sa Philippine Commission on Human Rights si Secretary De Lima.
Hayan motambong sa kalihukan si Bise Gobernador Concepcion Lim ug uban pang mga babay’ng piniling opisyal sa mga kalungsuran sa Bohol.
LOKAL NGA BALITA
MARSO 26, 2015
REYTUT’s
GIBUTYAG SA KAPOLISAN NGA ADUNA NAY GIKATAHAPAN SA PAGLUGOS UG PAGPATAY SA TINUN-AN NGA SI RODALYN GAMBA NIADTONG SABADO
Gipamahayag sa kapolisan sa siyudad nga aduna na silay lead sa nahitabong paglugos ug pagpatay sa usa ka tinun-an sa usa ka unibersidad dinhi sa dakbayan sa Tagbilaran.
Matud ni Police Senior Inspector Roland Desiree Lavisto sa aduna na silay gikatahapan sa pagpatay ni Rodalyn Gamba, 20 anyos taga Brgy. Banderahan lungsod sa Valencia apan dili pa kini nila ikabutyag aron dili maguba ang ilang gihimong lawom nga imbestigasyon.
Ang pagkamatay sa maong tinun-an sa University of Bohol aduna nay gamay’ng kahayag sa kasulbaran niini, sumala ni Lavisto.
Una nang gisaway ni Brgy. Kapitan Arnel Gamba ug sa pamilya sa biktima ang pagkamatay sa iyang pag-umangkon nga si Rodalyn.
Si Punong Barangay Gamba sa Brgy. Banderahan, Valencia nanawagan sa mga tinogyanan sa balaod nga paspasan ang ilang imbestigasyon busa gitinguha sa kapolisan nga maangkon sa pamilya sa biktima ang hustisya.
Link back to: Live Radio Recorded Broadcast Hot Topics